ОРАЛ. 8 ақпан. ҚазАқпарат - 5 ақпан күні іңір қараңғысында Ақжайық ауданына қарасты Қарауылтөбе ауылына қасқыр кіріп, ауыл иттерін талаған.
Ауыл әкімі Ғиззат Иқсанның хабарлауынша, ертесіне таңертен дала аңы аула қораларды паналап, ит пен малға шабуыл жасаған. Ауыл азаматы Айтқали Төлеуішев мылтық алып шығып атқанмен, онысы от алмаған.Қасқыр қашып жүріп, Ізімғали Жүсіпов деген 77 жастағы зейнеткердің ауласына кіріп, қойларға ауыз салған. Осы кезде ақсақал қасқырды айырмен соғып, бүйірден түйреген. Көршісі Николай Илгузин балта алып келіп, басынан бірнеше соққан. Сөйтіп, азулы аң өліп тынды.
Қасқырдың өлі денесі аудан орталығына әкелініп, зертханаға тапсырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).