Бұл туралы Ұлттық банк төрағасы Григорий Марченко бүгін Алматыда өткен баспасөз мәслихатында айтты.
Бас банкирдің айтуынша, аукциондарда 13,1 млрд. теңгенің 12 айлық МЕККАМ-ы, 13,2 млрд. теңгенің 3 жылдық МЕОКАМ-ы, 29,4 млрд. теңгенің 9 жылдық және 21,7 млрд. теңгенің 11 жылдық МЕУКАМ-дары мен 25 млрд. теңгенің 18 жылдық МЕУЖКАМ-мы орналастырылды. Орналастырылған бағалы қағаздар бойынша тиімді кіріс МЕККАМ-да - 2,13 пайыз, МЕОКАМ-да - 3,53 пайыз және МЕУКАМ-да 9 жылдықта - 4,90 пайыз, 11 жылдықта - 5 пайыз, ал МЕУЖКАМ-да инфляция деңгейінен 0,01 пайыз болды.
Қаржы министрлігінің айналымдағы бағалы қағаздарының көлемі мамырда оның алдыңғы аймен салыстырғанда 4,1 пайызға ұлғайып, 2338,5 млрд. теңгені құрады. Сондай-ақ Ұлттық банктің ноттары эмиссиясының көлемі мамырда сәуірмен салыстырғанда 25,9 пайызға азайып, 75,7 млрд. теңгені құрады. Бұл ретте, 3 айлық ноттарды орналастыру бойынша 2 аукцион (26,5 млрд. теңге және 10,4 млрд. теңге), 6 айлық ноттарды орналастыру бойынша 1 аукцион (19,5 млрд. теңге), 9 айлық ноттарды орналастыру бойынша 1 аукцион (19,3 млрд. теңге) өтті. Орналастырылған ноттар бойынша тиімді кірістілік 3 айлықта - 1,05 пайыз, 6 айлықта - 1,51 пайыз, 9 айлықта - 1,80 пайыз болды. Ал айналымдағы ноттар көлемі сәуірмен салыстырғанда мамырдың аяғында 8,4 пайызға төмендеп, 548,3 млрд. теңгені құрады.