Кая Каллас: ЕО Қазақстанмен стратегиялық серіктестікті тереңдетуді көздейді
АСТАНА. KAZINFORM – Еуропалық одақ Қазақстанды Орталық Азиядағы негізгі серіктес ретінде қарастырады және энергетика, сауда, экологиялық тұрақтылық пен білім сынды маңызды салалардағы ынтымақтастықты кеңейтуге дайын. Бұл туралы ЕО Жоғарғы өкілі Кая Каллас Silk Way телеарнасына берген сұхбатында айтты.
— Қазақстан – Еуропалық одақ үшін өте маңызды серіктес. Біз қарым-қатынасымызды, әсіресе экология, энергетика және сауда мәселелерінде тереңдете аламыз, - деді Каллас сұхбат барысында.
Ол ЕО-ның жасыл және цифрлық экономикаға көшуге қажетті маңызды шикізатқа қызығушылық танытатынын атап өтіп, осы секторларды дамытудағы өзара мүмкіндіктерге тоқталды.
— Бізде технология мен ноу-хоу бар. Еуропа адамдар үшін де, ғаламшар үшін де инвестиция салып, жаңа мүмкіндіктер жасауға дайын, - деді ол.
Каллас сондай-ақ энергияны әртараптандырудың маңыздылығына тоқталып, Қазақстанның бұрын бір ғана ел ресурстарына тым тәуелді болғанын атап өтті.
— Энергия жеткізуде тепе-теңдікті және қауіпсіздікті қамтамасыз ету үшін бірнеше серіктестің болуы маңызды, - деді ол.
Жаһандық тұрақсыздық жағдайында қауіпсіздік Еуродақтың сыртқы саясатының, оның ішінде Орталық Азиямен қарым-қатынасының орталық бағытына айналды.
— Қауіпсіздіктің өте күрделі жағдайында өмір сүріп жатырмыз. Сондықтан қауіпсіздік мәселесін міндетті түрде талқылауымыз қажет, - деді Каллас.
Сонымен қатар ЕО білім беру, зерттеу және Транскаспий көлік дәлізі мен Erasmus+ алыс-беріс білім бағдарламасын қоса алғанда инфрақұрылым салаларында жан-жақты ынтымақтастықты қолдайды.
— Самарқанда өтетін ЕО-Орталық Азия саммитіне дайындалудамыз. Онда сауда, энергетика және көлік байланысындағы өзара қатынастың маңызды қорытындысын шығарамыз, - деді ол.
Сұхбат барысында Каллас Орталық Азияда өркендеп келе жатқан аймақтық ынтымақтастыққа қолдау білдіріп, ЕО мен Қазақстанның барынша мығым байланысына сеніммен қарайтынын жеткізді.
Айта кетейік, бүгін Қазақстан Президенті Еуропа одағының Сыртқы істер және қауіпсіздік саясаты жөніндегі Жоғарғы өкілі — Еуропалық комиссияның вице-президенті Кая Калласпен кездесті.