Қазақстан-Ресей шекарасында тіркелмеген тапанша мен газ баллондарын алып өтпек болған қазақстандық ұсталды
10:38, 28 Қазан 2015
АСТАНА. ҚазАқпарат - Қазақстан-Ресей шекарасындағы шекара қызметінің Орал шекара отрядына қарасты «Жайық-теміржол» бақылау-өткізу бекетінің шекара жасағы «Мәскеу-Алматы» бағытындағы жолаушылар пойызына шекаралық бақылау жасау кезінде 1997 жылы туылған Максим есімді қазақстандық азаматты ұстады, деп хабарлайды ҚР ҰҚК Шекара қызметінің баспасөз қызметінен.
Аталған азаматтың спорттық сөмкесін қарау кезінде одан ішкі істер органдарында тіркелмеген «ПМ-ультра» пневматикалық тапаншасы, оған арналған 2500 дана оқ-дәрі, 14 дана газ баллоншалары табылды. Қазақстан Республикасы Әкімшілік-құқықбұзушылық кодексінің 482-бабына сәйкес ұсталған азаматқа қатысты материалдар Батыс Қазақстан облысы Тасқала аудандық ішкі істер бөліміне берілетін болады.