- Ағымдағы жылдың осы кезеңіне дейін жекешелендіруге 295 нысан қойылған. Оған қосымша әкімдіктер, әлеуметтік-кәсіпкерлік корпорациялар мен холдингтер 16 нысан ұсынды. Бүгінгі күні 82 нысан сатылды. Осы 311 нысанның 20-сы республикалық меншікте, 132-сі коммунналдық, 80-і ӘКК, 79-ы түрлі холдингтердікі, - деді ол.
Оның айтуынша, жалпы 3 млрд теңге бастапқы баға кезінде сату бағасы 4,6 млрд теңгені құрапты. Бұл бастапқы бағадан 1,5 есеге артық көрінеді.
- Қаражат түрлері мынадай болып бөлінеді: республикалық бюджетке 326 млн. теңге; облыстық бюджеттерге 380 млн теңге; холдингтер бойынша 3,6 млрд теңге және ӘКК бойынша 277 млн теңге, - деді комитет төрағасы.
Ал, осы брифинг барысында Қаржы министрлігінің Мемлекеттік мүлік және жекешелендіру комитеті төрағасының орынбасары Ғалымжан Ибрайымов қараша айында сатылымға шығарылатын нысандарды тізбектеп айтып берді.
- Қараша айында республикалық меншіктегі 4 нысан сатылымға шығарылады деп жоспарлануда. Олардың арасынде ең ірі деген нысан - «Қазаэрожоба» ғылыми-зерттеу және жобалау-іздестіру институты. Сонымен қатар, коммуналдық меншіктегі 28 нысан да сатылады деп күтілуде. Олардың арасында 6 тілдерді оқыту орталығы мен 6 БАҚ, 5 спорт клубы және абаттандыру саласындағы 5 нысан бар, - деді ол.
Оның айтуына қарағанда қараша айында сонымен қатар, холдингтердің меншігіндегі 7 нысан, әлеуметтік кәсіпкерлік корпорациялардың меншігіндегі 4 нысан сатылымға шығарылатын көрінеді.
Естеріңізге салайық, ағымдағы жылдың 1 қыркүйегінен бастап Қазақстанда заңдастыру және жария ету науқаны жүріп жатыр. Жекешелендірудің кезекті толқыны барысында мемлекеттік нысандармен қатар, спорттық клубтар, мәдени нысандар және оқу орындары, жекеменшік тұрғын үйлер, сондай-ақ, өзге де мемлекет қаржыландыруында тұрған нысандар жекенің қолына өтетін болады.
Сонымен қатар, қазақстандықтардың шетелде жасырған ақшасы мен дүние-мүлкін де жария етуіне мүмкіндік беріліп отыр. Науқан аясында шетелде жасырылған қаражатқа рақымшылық жасалатын болады.