Жақында Астанадағы «Қазақстан» концерт залында өткен патриоттар форумына қатысқан Ақмола облыстық мәслихатының депутаты, белгілі кәсіпкер Елена Мащинская осындай пікір білдірді.
Оның айтуынша, бүгінгі күні тәуелсіз елімізде жастардың үлгі-өнеге алатын аға-әпкелері баршылық. Тек олардың істеген игі істерін жастарға көрсетіп, насихаттау қажет. «Маған патриоттар форумында солардың біразымен танысуға, әңгімелерін тыңдауға мүмкіндік туды. Еңбегімен, дарынымен ерекшеленген отандастарымызды бетке ұстап, жастарға жарқын мысал ретінде ұсынуға болады. Жарқайың ауданында тұратын жерлес кәсіпкеріміз Ерлан Алин форумда арнайы номинациямен марапатталғанда да кеудемізді зор мақтаныш сезімі кернеді. Асхат Мырзабаев есімді замандасымыздың өз еңбегімен тапқан қомақты қаржыны ісік ауруына шалдыққан науқастарға көмек ретінде аударғаны жайлы сөзінен де біраз ой түйдік. Шындығында, тырысып көрсек, мұндай игі істер әрбіреуіміздің қолымыздан келеді. Менің ойымша, жаңа қазақстандық патриотизм Мәңгілік Ел идеясымен біте қайнасып жатыр. Бұл жолғы форумның негізгі мақсаты да жас ұрпақты патриоттық істерге баулу болып табылады. Ендігі кезекте біздің алдымызда жастарға Мәңгілік Ел идеясын белсене насихаттау міндеті тұр.
«Қазақстан» концерт залында патриоттар форумына жиналған көпшілік қауымның тең жартысын жастар құрады. Осының өзі біраз жайды аңғартып тұрғандай. Еліміздің болашағы да, күш-қуаты да жастардың қолында екені анық»,- дейді Е.Мащинская.