ОРАЛ. ҚазАқпарат - Грузия астанасы Тбилиси қаласында самбодан өткен «А.Чохелидің мемориалы» халықаралық турнирінде батысқазақстандық палуан, самбодан төрт дүркін әлем чемпионы Ерболат Байбатыров күміс медальді жеңіп алды.
БҚО дене шынықтыру және спорт басқармасынан түскен мәліметке қарағанда, Ерболат 57 кг салмақта алдымен жергілікті палуанды тізе бүктірсе, содан кейін Армения елінің өкілін ұтты. Үшінші белдесуінде ресейлік палуаннан басым түскен, Қазақстанның еңбек сіңірген жаттықтырушысы Райымбек Меңдіғалиев баптап жүрген Ерболат Байбатыров финалда ғана Грузия самбошысына есе жіберді.
Еске сала кетейік, Е.Байбатыров осыған дейін Ресейдің Кстово қаласында «М.Бурдиковтың мемориалы» халықаралық турнирінде де күміс жүлдені еншілеген болатын.
«Осы екі халықаралық жарыста жүлде алуым маған самбодан әлем чемпионатына қатысуыма мүмкіндік береді. Биыл дүниежүзілік додада 10-14 қараша күндері Болгария астанасы София қаласында өтеді. Осы әлем біріншілігінде ел намысын абыроймен қорғап, жүлдеге ілігу үшін барымды саламын», деді Қазақстанның еңбек сіңірген спорт шебері Е.Байбатыров ҚазАқпарат тілшісіне.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).