ОРАЛ. 16 қараша. ҚазАқпарат /Елжан Ералы/ - Елімізде жаңаша ойлайтын жас басшыларды қалыптастыру бағытында «Жастардың кадрлық резерві» жобасы қолға алынған болатын. Қазіргі кезде жобаның екінші және үшінші кезеңі өткізілуде. Жобаға қатысуға 700 жас ниет білдірсе, соның 100-і осы кезеңдерден өтті. Қазақстанның батыс аймағынан келген 19 жас «Жас Отан» жастар қанатының ұйымдастыруымен Оралда бас қосып, өз жобаларын ұсынды.
«Жастардың кадрлық резерві» жобасының бас менеджері Әлия Хайруллинаның айтуынша, көшбасшы болуға ұмтылған жастар әлі де іріктеуден өтеді. Олар адамдармен тіл табыса біліп, мемлекеттік басқару, бизнес, қоғамдық қызмет және басқа салаларда өз іскерлік қабілеттерін көрсете білуі тиіс.
Өткен жылы осы жоба негізінде іріктеліп шыққан 32 жас қазіргі уақытта ұлттық компаниялар, мемлекеттік және жеке кәсіпорындарда табысты еңбек етуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).