Бейсенбі күні өткен Бүкілқытайлық халық өкілдері жиналысының жыл сайынғы сессиясының ашылуында ұсынылған есепте билік белгіленген межеден жоғары өсімге қол жеткізуге ұмтылатынын атап өтті. Құжатта тұтыну бағалары индексінің өсімі 2%, ал жұмыссыздық деңгейі шамамен 5,5% деңгейінде сақталады деп көрсетілген.
Әлемдегі екінші ірі экономиканы ынталандыру мақсатында Қытай үкіметі бюджет тапшылығын ЖІӨ-нің 4%-ына дейін ұлғайтуды жоспарлап отыр. Бұл 5,89 трлн юаньды ($853,6 млрд) құрайды, ал бұл өткен жылмен салыстырғанда 230 млрд юаньға ($33,3 млрд) артық.
Жалпы мемлекеттік бюджеттік шығыстар алғаш рет 30 трлн юаньға ($4,35 трлн) жетпек, бұл өткен жылмен салыстырғанда 1,27 трлн юаньға ($184 млрд) көп. Бұл Қытайдың белсендірек бюджеттік саясатқа көшкенін білдіреді.
2026 жылға арналған қарыз алу бағдарламасына 1,3 трлн юань ($188,4 млрд) көлемінде арнайы ұзақмерзімді мемлекеттік облигациялар шығару кіреді. Бұл қаражат:
мемлекеттік басым жобаларды жүзеге асыруға,
стратегиялық маңызды салалардың қауіпсіздігін күшейтуге,
өнеркәсіптік жабдықтарды жаңартуға,
халық тұтынуын ынталандыру бағдарламаларын қаржыландыруға (соның ішінде ескі техника мен тауарларды жаңасына ауыстыру бағдарламаларына) бағытталады.
Қаржы секторын қолдау аясында Қытай билігі 300 млрд юань ($43,5 млрд) көлемінде арнайы облигациялар шығарып, ірі мемлекеттік банктердің капиталын толықтыруды жоспарлап отыр. Бұған қоса, жергілікті билікке арналған мақсатты облигациялар квотасы 4,4 трлн юаньды ($637,7 млрд) құрайды. Бұл өңірлерге инфрақұрылымдық жобаларды жүзеге асыруда қаржылық қолдау береді.
Айта кетейік, бұған дейін Қытайдың 2026 жылы қорғаныс шығындарын 7%-ға арттыратыны хабарланған болатын.