«Астана қаласында автобус жүргізушілерінің айлығы шамамен 350 мың теңге. Жүргізуші орташа есеппен қанша алу керек - сонша ақыны қазір олар (жүргізушілер - авт.) алып жүр. Сіздерге айтарым, осыншама ақша алып жүрсе де, жұмыс тәртібінің қиындығына байланысты көп адам жұмыс істегісі келмейді», - дейді ол.
Бауыржан Тілеубергеновтың айтуынша, жүргізушілердің айлығын міндетті түрде өсіру керек.
«Мен олардың айлығын өсіруге дайынмын. Әлбетте, егер тариф көтеріліп, жанар-жағармай мен қосымша саймандардың бағасы арзандаса...», - дейді автопарк басшысы.
Айта кетсек, 2014 жылға дейін Астанада қазіргі заңнамаларға сәйкес келмейтін автбустар (қолданыста жүргеніне 14 жылдан асып кеткен - авт.) қатынап жүрген еді. 2014 жылы қоғамдық көліктер құрамы жаңартылып, ИВЕККО маркалы 357 автобус сатып алынды. Мұнымен тоқталмай, елордаға 2015-2016 жылдары халықаралық стандарттарға сәйкес келетін тағы 380 автобус әкелінді. Қазіргі таңда қала ішіндегі 1140 автобус күніне 800 мың адамға қызмет көрсетеді.