«Айқын» газетінің бүгінгі апталық нөмірінде «Қысқарту қызметке кедергі келтіретін науқанға айналмауы тиіс» деген мақала жарияланды. Басылымның жазуынша, Елбасының 2010 жылдың 27 қыркүйегіндегі №1072 Жарлығына сәйкес, республика бойынша мемлекеттік қызметкерлер санын 15 пайызға қысқарту жүргізілуде. Жарлықта қай мемлекеттік органнан қанша адамның қысқартылатыны нақты көрсетілген. Оған сәйкес орталық атқарушы органдардың аймақтық өкілдіктерін қосқанда, қысқарту саны 15 пайыздан аспауы қажет. Сөйтіп, барлық қысқартылатын қызметкерлер саны 26213 адамды құрауы керек. Алайда кейбір мемлекеттік органдарда адамдар саны тым көп қысқартуға ұшырайтын түрі бар. Мәселен, Статистика агенттігінің облыстық және аудандық бөлімдерін қосқанда, барлығы 3676 адамды құраса, агенттіктің жауапты хатшысының 2010 жылдың 30 қыркүйегіндегі бұйрығына сәйкес, штат лимиті 2165 адам болып белгіленген. Нәтижесінде 1511 адам қысқартылуы қажет болып отыр. Бұл, әрине, 15 пайыздан бірнеше есе артық.
Сондай-ақ «Айқын аптаның» бүгінгі санындағы «Ұлы құрылтай. Ұлттық жоспар» деген тақырыппен мақала берілді. «Халықаралық эксперттердің өздері «Қазақстанда этностық тілдерді оқытудың ТМД-дағы ең дамыған жүйесі құрылған деген байлам жасап отыр. Бізде ассирийліктер, ирандар, ноғайлар, дұнғандар сияқты саны аз ұлыстар үшін де төл тілдері мен мәдениеттерін дамытуға барлық мүмкіндіктер жасалған. ЮНЕСКО-ның тілдер атласының соңғы мәліметтері бойынша, дүниежүзіндегі қолданыстағы 7 мың тілдің 2 мың 511-і жойылу қаупі алдында тұрған жағдайда қазақтардың мұнысы игі іс, қайырымды қадамдар екендігі даусыз. ЕҚЫҰ құрылымдарының 2005 - 2006 жылдары Қазақстандағы тілдік саясатты зерделеу қорытындылары бойынша, 2006 жылғы 12 желтоқсанда ЕҚЫҰ-ның Аз ұлттар істері жөніндегі Жоғарғы комиссарының офисінде Қазақстандағы тіл саясаты барлық посткеңестік кеңістіктегі ең әділі деп жарияланды», делінген мақалады.
***
«Алаш айнасы» басылымының жазуынша, бұрынғы Ақпараттандыру және байланыс агенттігінің төрағасы Қуанышбек Есекеев «ұялы телефондардың негізгі бөлігінде қазақша шрифтпен смс (қысқа хабар) жолдау мүмкіндіктерін қарастырамын», деп уәде еткелі екі жыл өтті. Ұялы телефон қазір жұрттың басым бөлігінде бар. Сонымен қоса күн сайын қазақстандықтар смс-сервисті бірнеше рет пайдаланады. Неге біз мәтінді тергенде ана тілімізді бүлдіріп, ағылшын немесе орыс тіліне жүгінеміз. Бәсекеге қабілетті мемлекет кез-келген мәселені өзінің ана тілінде жүргізеді. Сондықтан да ұялы байланыс операторларын смс-ті қазақша жолдауға болатын бағдарламамен қамтамасыз етуге міндеттеу керек. Бұл жайында «Алаш айнасы» басылымының бүгінгі санындағы «Мамандар азайып, бастықтар көбейіп барады» атты мақаладағы «Қазақша «смс» қашан болады?, деген тақырыпшадан оқи аласыздар.
Сондай-ақ аталмыш басылымның дәстүрлі «Алашты алаңдатқан бір сауал» атты айдары асында «Дарынды жастардың шетелге кетуіне қалай тосқауыл қоюға болады?» деген сауал тасталған. Бұл сұрақа жауап берген заң ғылымының докторы, профессор Арықбай Ағыбаевтың айтуынша, қазіргі таңда дарынды жастардың барлығы жаппай шетелге кетіп жатыр деуге болмайды. Аздаған деректер бар. Бірақ қазірден бастап алдын алмаса тағы болмайды. Әйтпесе жастар арасында қызығушылық арта түсіп, ертеңгі күні тізгіндей алмай қалуымыз ғажап емес. Десек те шетелге кешегі күні жігерлене кеткен жастарымыз опық жеп қалып жатыр. Жастардың осы мәселені де ескере жүргендері абзал. Сондай-ақ ғалымның пікірінше, шетелге құмар жастарды райынан қайтару үшін қолданыстағы заңдарға толықтырулар енгізу керек.
***
«Астана ақшамы» басылымының жазуынша, бүгінде елімізде дене шынықтыру сабағы «екінші сорттағы» пән сияқты қарастырылады. Бұл пәнге бірен-саран спорт десе ішкен асын жерге қоятындар ынтықпаса, қалғандары аса құлшынып, тартыла қоймайды. Әлемнің ірі ареналарында өтіп жатқан спорттық бәсекелерде қазақтың көк байрағы желбіреп, қоржынға алтынды көбірек салу үшін қазақ жастарын мектепте жүрген кездерінен бастап, спортқа баули берген дұрыс. Екіншіден міндетті түрде спортшы болмаса да салауатты өмір салтын ұстану үшін әрбір дене шынықтыру пәнінің мұғалімі спорттың тек доп қуалап, шаршы алаңды бір-екі айналып жүгіріп өтумен шектелмейтінін ұғындыра білуі керек. Бұл мәселе жөнінде білгіңіз келсе, басылымның бүгінгі санындағы «Дене шынықтыру пәніне көңіліміз толып жүр ме?» деген мақалаға зер салыңыз.
***
«Казахстанская правда» басылымының бүгінгі нөмірінде «Готовы прийти на помощь» деген тақырыппен мақала берілді. Басылымның жазуынша,желтоқсанда елордада өтетін ЕҚЫҰ-ның Астана Саммитіне дайындық жұмыстары елімізде барынша қарқынды әрі кешенді түрде жүргізілуде. Дайындық шараларының ең маңыздыларының бірі - азаматтарға медициналық көмек көрсету. Аталмыш міндетті талапқа сай жүзеге асыру үшін елорданың денсаулық сақтау ұйымдарының барлығы жұмылған жұдырықтай болып дайын отыр. Ал Денсаулық сақтау министрлігінде осы уақытта Саммитке арнайы дайындық жөніндегі штаб құрылған.