ОРАЛ. ҚазАқпарат - Бөкей ордасы аудандық сотының үкімімен Ерлан Мұзданов ҚР ҚК 291-бабы 3-бөлігі 1-тармағы, 308-бабы 4-бөлігі «в» тармағымен (1997 жылғы редакцияда) айыпты деп танылып, құқық қорғау органдарында 7 жыл қызмет атқару құқығынан, 5 жыл 6 ай мерзімге бас бостандығынан айырылды.
БҚО прокуратурасының баспасөз қызметінен түскен мәліметке қарағанда, ол сондай-ақ полиция майоры шенінен де айырылды. Е.Мұзданов учаскелік полиция инспекторы міндетін атқара жүріп, өз өкілеттілігін асыра пайдаланып, рұқсат мерзімінің аяқталуына байланысты басқа азаматтан алынып, қызметтік сейфте сақтаулы тұрған аңшы мылтығын Баешов деген азаматқа сатып жіберген.
Сот сонымен қатар мемлекеттік айыптаушының өтінішхатына сәйкес Мұздановтың ауыр қылмыс жасағанын біле тұра, оның еңбек сіңірген жылдары бойынша зейнеткерлік жасқа жетуіне байланысты зейнетке шығуына ықпал еткен Бөкей ордасы аудандық ішкі істер бөлімі басшылығына қатысты жеке қаулы шығарды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).