АСТАНА. ҚазАқпарат - Шанхайда мәнерлеп сырғанаудан өтіп жатқан әлем чемпионатында ерлер арасындағы бәсеке мәреге жетті.
Қазақстандық Денис Тен кеше қысқа бағдарламадан кейін 85,89 балмен үшінші орында тұрса, бүгін де сол сатыдан төмен түскен жоқ. Еркін бағдарламадан 181,83 балл жинаған Денис қорытындыда оны 267,72-ге жеткізді, сөйтіп әлем чемпионатының қола жүлдесін жеңіп алды.
Өткен жылғы әлем чемпионы және Сочи олимпиадасының жеңімпазы, жапондық Юдзуру Ханю бұл жолы 271,08 балмен күміс жүлдені қанағат тұтты. Ал алтын медальді испандық Хавьер Фернандес (273,90 балл) қанжығасына байлады. Бұған дейін әлем чемпионатының екі мәрте қола жүлдегері атанған ол Испанияға тұңғыш рет алтын медальді сыйлады.
Айта кетейік, Денис Тен осыған дейін 2013 жылы әлем чемпионатының күміс, 2014 жылы Сочи олимпиадасының қола жүлдегері атанса, биыл төрт құрлық жарысын ұтқан еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).