ОРАЛ. ҚазАқпарат - «Су спорты түрлері бойынша балалар-жасөспірімдер спорт мектебі» МКҚК-ны тексерген кезде мекеме директоры оқу ісі жөніндегі орынбасарының Қазақ спорт және туризм академиясын бітіргендігі туралы жалған құжатпен жұмыс жасағаны белгілі болды.
Орал қаласы прокуратурасынан түскен мәліметке қарағанда, аталған факті бойынша ҚР ҚК 385-бабы 3-бөлігіне сәйкес қылмыстық іс қозғалып, қазір ол қалалық ішкі істер басқармасында қаралу үстінде.
Сонымен қатар санитарлық талап-ережелердің бұзылғаны анықталды. Атап айтқанда, жүзу жолдары оқу-жаттығу кезінде жалға берілген, сөйтіп ол жасөспірімдердің оқу үдерісіне кедергі келтірген. Мұнда оқымайтын, сондай-ақ тиісті медициналық қараусыз және анықтамасыз адамдардың келуі, жаттығудың дәрігерсіз жүргізілуі орын алған. Еңбек және салық заңдылығын бұзушылық та тіркелген.
Аталған заңбұзушылықтарды жою жөнінде БҚО дене шынықтыру және спорт басқармасына ұйғарым берілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).