Мемлекет 4 млн қазақстандыққа тегін дәрілердің баламасын «бірлесіп сатып алу» мүмкіндігін ұсынбақшы

АСТАНА. KAZINFORM — Мемлекеттен тегін дәрі алатын қазақстандықтар рецептіде жазылған дәрінің баламасын алғысы келсе, оның ақысын мемлекет ішінара өтеп береді. Денсаулық сақтау министрінің орынбасары Тимур Мұратов Үкімет отырысында «бірлесіп төлеу» тәсілі 4 млн адамды қамтитынын айтты. 

— Министрлік бірлесіп төлеу тетігін қолдану арқылы амбулаториялық дәрі-дәрмекпен қамтамасыз етуді «орталықсыздандыруға» көшіп жатыр.

Бұл тетік ерікті түрде жүзеге асырылады және қосымша төлем тек пациенттің қалауы бойынша қарастырылады, — деді ол.

Бұл тәсіл жеке меншік дәріхана желілері арқылы да іске асырылады.

— Жоба науқастарға дәрілерді өз қалауы бойынша таңдауға мүмкіндік береді. Жалпы алғанда 4 млн адамға дейін қамтамасыз етуді жоспарлап отыр, — деді вице-министр.

Айта кетейік, бүгін Үкімет халықты дәрі-дәрмекпен қамтамасыз ету жайын талқылап жатыр.