Обама Иранға шабуыл жасалу мүмкіндігін жоққа шығармайды, бірақ, оны «идеалды» вариант емес деп санайды

АСТАНА. Қыркүйектің 21-і. ҚазАқпарат - Барак Обама Иранға шабуыл жасалу мүмкіндігін жоққа шығармайды, бірақ, бұл Иранның ядролық бағдарламасының төңірегінде қалыптасқан жағдайдан шығудың «идеалды» варианты емес, деп санайды. АҚШ Президенті дүйсенбі күні Си-Эн- Би-Си телекомпаниясында халықпен тілдесу форматында өткен бағдарламада осы ойын қуаттады, деп хабарлайды ИТАР-ТАСС агенттігі.

Телебағдарлама АҚШ-тың экономикалық проблемаларына және халықаралық тұрақтылық пен қауіпсіздікке негізделген Иран туралы мәселеге арналды. Жүргізуші қазір Иранға шабуыл жасайтын кез емес екенін айтқан АҚШ-тың экс-мемлекеттік хатшысы Колин Пауэллдің сөзін мысалға келтіре отырып, Обаманың оған қатысты пікірін сұрады.

Обама өз жауабында, ең алдымен, «Пауэлл - өте ақылды адам» екенін айта келіп, дегенмен, «ядролық қаруға ие Иранның нақты проблема екенін» жеткізді.