ОРАЛ. 29 маусым. ҚазАқпарат /Елжан Ералы/ - Ақсай қаласында тұратын өңірге танымал композитор Ғұбайдолла Хибашев шығармашылық қызметінің 40 жылдығына орай «Ақжайық - өлкем» атты ән кешін өткізді.
Ұзақ жыл Тайпақ ауданында мәдениет саласында мақтаулы еңбек еткен Ғ.Хибашев ел сүйсініп айтатындай әндер де жазды. Қазір оның туындыларын Қазақстанның еңбек сіңірген әртісі Қанатқали Қожақов сынды белгілі әншілер орындап жүр. Әсіресе, автордың туған жер, жастық шақ, махаббат тақырыбына жазған әндері кең таралған.
Аталған кеште де Қазақстанның еңбек сіңірген әртісі Сәуле Таудаева, республикалық және халықаралық байқаулардың лауреаты Марат Сарбөпеев және басқа әншілер сахнаға шықты. Ғұбайдолла Хибашевтің ұлдары Омар мен Бейбіт те - әншілер.
Мерейтой иесін Бөрлі ауданы әкімінің орынбасары Талғат Сидық, алыс-жақыннан келген әріптестері құттықтап, ізгі тілектерін білдірді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).