18:41, 15 Сәуір 2009

Орал қаласында есірткі саудасымен айналысқан бір отбасыдан он жылда 23 адам сотталған

ОРАЛ. Сәуірдің 15-і. ҚазАқпарат /Ғайсағали Ералы/ - Заңсыз есірткі айналымына қатысты қылмыс саны жыл сайын көбейіп отырғандықтан, Қазақстан да қатаң жаза қолдануға көшкен болатын. Таяуда БҚО-да да есірткі саудасына қатысты ауыр қылмысы үшін өмір бойы түрмеде отыру жазасы қолданылуы мүмкін.

Бұл туралы облыстық ІІД есірткі бизнесімен күрес басқармасының бастығы Төлеуғали Ерғалиев мәлім етті, деп хабарлайды ҚазАқпарат тілшісі. Оның пікірінше, бұл дұрыс, өйткені Орал қаласында есірткі саудасын «отбасылық бизнеске» айналдырып, төрт мәрте сотталғандар да бар. Тіпті ет комбинаты ауданында тұратын бір сыған отбасынан 10 жылда 23 адам сотталған. Түзелуге тырыспайтын мұндайларға қатаң жаза керек-ақ. Биылғы бірінші тоқсанда басқарма өкілдері 108 құқықбұзушылықты анықтады, 69 қылмыстық іс көтеріліп, 8 киләға жуық есірткі тәркіленген. Облыстық денсаулық сақтау департаментінің мәліметіне сәйкес өңірде 1507 нашақор тіркелген. Оның 121-і әйел болса, төртеуі кәмелетке толмаған.
Аймақ Заң және құқық
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).