ОРАЛ. 18 қыркүйек. ҚазАқпарат - Ә.Мәмбетовтің 80 жылдығына арналған Қазақстан драма театрларының ХХ республикалық фестиваліне құрметті мейман ретінде келген А.Малдыбаев атындағы қырғыз ұлттық академиялық опера және балет театры Батыс Қазақстан облыстық қазақ драма театрының сахнасында «Шығыстың қос саңлағы: Мәмбетов пен Айтматов әлемі» атты гала-концертін қойды.
Концерт басталар алдында театрдың бас директоры, музыкатанушы, композитор, Қырғызстанның еңбек сіңірген қайраткері Тимур Саламатов ізгі тілегін білдіріп, Батыс Қазақстан облыстық мәдениет басқармасының бастығы Айдар Батырханов, облыстық қазақ драма театрының директоры Құжырғали Төлеуішев, бас режиссері Мұқанғали Томанов, театр труппасының жетекшісі Мұсағали Бектенов, Қыз Жібектің бейнесін сахнаға шығарған Айжан Қайыроваға дипломдар табыс етті.
«Манас» жырымен басталған концертте классикалық шығармалармен қатар Абай әндері, Қыз Жібектің ариясы орындалды. Әсіресе, Қырғызстанның халық әртісі, театр солисі Сталбек Алмасбековтің батысқазақстандық әнші, кезінде консерваторияда бірге оқыған досы Сырым Аманғалиевпен бірге Абайдың әнін шырқауы ерекше әсер қалдырды.
Қырғыз әртістерінің өнерін Ақ Жайық жұртшылығы жылы қабылдап, құрмет көрсетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).