ОРАЛ. 10 қыркүйек. ҚазАқпарат - 8 қыркүйекке қараған түні Орал қаласында екі бірдей ұрлық оқиғасы тіркеліп, күдіктілер ұсталды.
Облыстық ішкі істер департаментінің баспасөз қызметінен түскен мәліметке қарағанда, 23 жастағы қала тұрғынының пәтерінен ноутбук, алтын бұйымдар қолды болған. Полицейлер ұрының нашақор ретінде есепте тұратын 31 жастағы азамат екендігін анықтады.
Сол түні Беларусь елінің азаматы да тоналды. «Тропикана» мейманханасына тоқтаған оның бөлмесінен 900 АҚШ доллары, 12 мың 710 ресей рублі, 35 мың беларусь ақшасы және 6 мың теңге қымқырылған. Полицейлер алаяқ, ұялы телефондарды ұрлаушы ретінде есепте тұрған Жәнібек ауданының 25 жастағы тұрғынын құрықтады. Ол уақытша ұстау абақтысына қамалып, басқа қылмыстарға қатыстылығы тексерілуде.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).