ОРАЛ. 8 ақпан. ҚазАқпарат /Елжан Ералы/ - Оралда допты хоккейді одан әрі дамыту үшін жасанды мұз айдыны қажет. Бұл туралы «Ақжайық» спорт клубы» АҚ бас директоры Нұфтолла Түменов мәлім етті.
Оның айтуынша, Қазақстанның допты хоккейшілері ел намысын абыроймен қорғай алатынын Алматыда өткен Азиада додасында дәлелдеді. «Моңғолия командасымен болған допты хоккей финалын Елбасының келіп тамашалауы ойыншыларға қанат бітірді. Бұл аталмыш спорт түріне елімізде көңіл бөлініп отырғанын айғақтай түседі. Алдағы жылы допты хоккейден әлем біріншілігі Алматы қаласында өтеді. Қазақстан допты хоккей федерациясы «А» тобындағы мықты командалардың сайысын сол Алматыда өткізіп, төменгі топтың жарысын Орал қаласында ұйымдастыру мүмкіндігін қарастырып отыр. Бұл үшін, әрине, ең алдымен жасанды мұз айдыны қажет. Мұндай мұз айдыны болса, өңірдегі допты хоккей спорты дами түсер еді», - деді Н.Түменов.
Ертең елге оралатын «Ақжайық» командасы Ресей чемпионаты бірінші лигасындағы ойындарын жалғастырады. 9 ақпанда оралдықтар бірінші лигадағы ең күшті командалардың бірі - Мончегорскінің «Кольская ГМК» клубын қабылдайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).