ОРАЛ. Тамыздың 31-і. ҚазАқпарат /Елжан Ералы/ - Тамыздың 24-інде «Құқық тәртібі» жедел алдын алу шарасы кезінде Орал қаласындағы Жәңгір хан көшесіндегі үйдің ауласынан отыз жасар ер адамның мүрдесі табылды.
Облыстық ішкі істер департаментінің баспасөз қызметінен ҚазАқпарат тілшісіне хабарлағанындай, сот-медицина сараптамасына сәйкес ол есірткі затынан уланған. Оның күртесінің оң жақ қалтасынан сараптама қорытындысына сәйкес 2,5 грамм героин табылды.
Сол күні Ғ.Құрманғалиев пен Придорожная көшелерінің қиылысында департаменттің ұйымдасқан қылмыспен күрес басқармасы мен «Арлан» арнайы мақсаттағы бөлімшесінің қызметкерлері 33 жасар азамат айдап келе жатқан «ВАЗ-2107» автокөлігін тоқтатты. Автокөлік салонынан 2 килә 699 грамм марихуана және 16 калибрлі шолақ аңшы мылтығы алынып, тәркіленді.
Сондай-ақ тамыздың 28-інде бұрын сотталған 1981 жылғы П. деген азаматтың үйінен сату мақсатында сақталған кептірілмеген 28 килә марихуана табылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).