ОРАЛ. 18 қараша. ҚазАқпарат /Елжан Ералы/ - Оралда «Қауіпсіз жол қозғалысы» шарасы аясында байқаулар ұйымдастырылды.
БҚО ІІД жол полициясы басқармасының аға инспекторы, полиция майоры Нұртай Лезовтың хабарлағанындай, жол ережесін білу, көлік жүргізу, жол апаты бола қалған жағдайда алғашқы медициналық көмек көрсетуден қаладағы автомектептер курсанттары сынға түсті. Оған барлығы 12 үміткер қатысты. Бір қызығы, байқау барысында қыздар ұқыптылығымен, ептілігімен көзге түсті. ҚР көлік құралдарын жүргізу одағының өкілі Ольга Панова жеңімпаз атанса, «Самат» автомектебінен келген Татьяна Балалаева екінші, Сулейман Гасанов («Тілек» автомектебі) үшінші орынды еншіледі. Оларға грамота, кубоктар табыс етілді.
Осындай сайыс жол полициясы қызметкерлері арасында да өткізілді. Жігіттерден капитан Болат Жаңабаев үздік атанса, қыздардан Жанна Садырова (ол да капитан) озық шықты.
Сондай-ақ қала мектептерінде оқитын 1-2-сынып оқушылары сурет салып, шығарма жазудан өз өнерлерін көрсетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).