ОРАЛ. 15 сәуір. ҚазАқпарат - Батыс Қазақстан, Ақтөбе, Атырау және Маңғыстау облыстарындағы жоғары оқу орындары ректорларының аймақтық кеңесі құрылып, жұмыс жасай бастады.
Жәңгір хан атындағы Батыс Қазақстан аграрлық-техникалық университетінде осыған орай таяуда құрылтай жиналысы болып, онда аталмыш ЖОО ректоры, ауыл шаруашылығы ғылымдарының докторы, профессор, академик Қазыбай Бозымов кеңес төрағасы болып сайланды.
Оның айтуынша, аймақтық кеңес ҚР Білім және ғылым министрі Бақытжан Жұмағұловтың тапсырмасына сәйкес құрылды. «Аймақтық кеңес Қазақстанның батысындағы 12 университеттің басын біріктіріп отыр. Онда ЖОО алдына қазіргі таңда қойылып отырған биік мақсат-міндеттер мен өзекті мәселелер талқыланып, қажет жағдайда министрлік атына ұсыныстар берілетін болады. Сондай-ақ кейбір мәселелер тетігі орталықтан алынып, аймақтарға беріліп жатыр. Кеңес жылына кемінде екі-үш рет бас қосуды көздейді. Ал жақында Қазақстан ректорларының одағы да құрылмақшы. Осының бәрі ЖОО-лардың заман ағымынан қалмай, бәсекеге қабілетті болуы үшін жасалуда», деді Қ.Бозымов.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).