ОРАЛ. 18 қыркүйек. ҚазАқпарат - Батыс Қазақстан облыстық тарихи-өлкетану мұражайында атақты күйші, Қазақстан халық әртісі Қали Жантілеуовті еске алуға арналған көрме ашылды.
Оған күйшінің немересі, белгілі домбырашы Болат Қаденов, музыка мектептерінің түлектері, Құрманғазы атындағы музыкалық колледж студенттері қатысты.
Биыл Қали Жантілеуовтың туғанына 110 жыл толды. Көрмеге оның қолжазбалары мен қолданған жеке заттары, домбырасы қойылды. Немересі келушілерге күйші туралы көптеген мәліметтер айтып берді. Соның ішінде Батыс Қазақстан облысында күй тарту дәстүрі Құрманғазы мен Дәулеткерей заманынан осы күнге Қали Жантілеуов сынды домбырашылардың орындау шеберлігі арқасында жеткені туралы да сөз болды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).