Оралда Махамбет оқулары мәреге жетіп, жаңа журнал таныстырылды (ФОТО)
Алқалы жиынды университеттің бірінші проректоры, тарих ғылымдарының докторы, профессор Әсет Тасмағамбетов ашып, Махамбеттей ұлы ақын әрі батырдың өмірі мен шығармашылығын зерттеудің алдағы уақытта да жалғаса беретінін жеткізді.
Конференцияда Әл-Фараби атындағы Қазақ ұлттық университетінің профессоры, филология ғылымдарының докторы, академик Зинол-Ғабден Бисенғали, М.Оспанов атындағы Батыс Қазақстан мемлекеттік медицина университеті әлеуметтік саяси пәндер кафедрасының меңгерушісі, философия ғылымдарының докторы, академик Алтай Тайжанов, Қ.Жұбанов атындағы Ақтөбе өңірлік университеті Жұбановтану ғылыми-зерттеу зертханасының меңгерушісі, филология ғылымдарының кандидаты Болат Баймұханов өз ой-толғамдарымен бөлісті. Сондай-ақ М.Өтемісов атындағы Батыс Қазақстан мемлекеттік университетінің аға оқытушысы, тарих ғылымдарының кандидаты Жаңабек Жақсығалиев Исатай мен Махамбет бастаған ұлт-азаттық көтерілісінің шығу себептері, Исатай батырдың Хан ордасын қоршап тұрып, неліктен шаппағандығы жөнінде өз дәлелдерін келтірді.
Конференцияға ұсынылған баяндамалар жеке жинақ болып шықпақ.
Бұл жиынның бір жаңалығы, «Исатай-Махамбет» атты жаңа ғылыми-педагогикалық, тарихи-әдеби, ақпараттық-танымдық журнал көпшілікке таныстырылды. Сөйтіп қазақ тарихында орны ерекше қос бірегей тұлғаның өмірі мен ерлігін, Махамбеттің ақындығын кейінгі жастарға таныту бағытында тағы бір игі қадам жасалды.