ОРАЛ. 21 маусым. ҚазАқпарат - «Нұр Отан» ХДП БҚО филиалында 20 маусым күні «Аймақтағы мемлекеттік бағдарламаларды тиімді жүзеге асыруда «Нұр Отан» партиясының рөлі» тақырыбында семинар-тренинг өткізілді.
Жиынға Ақтөбе өңірлік партиялық оқыту орталығының директоры Юрий Голубев ұйытқы болды. Облыстағы партия белсенділерін жинаған тренинг жұмысын облыс әкімінің орынбасары Серік Сүлеймен кіріспе сөз сөйлеп ашты. «Мемлекеттік бағдарламалардың уақтылы және сапалы орындалуын қатаң қадағалау үшін партия мен оның белсенділерінің беделін көтеру маңызды», - деді Серік Кенжебекұлы. Өзге өңірлердегі секілді Батыс Қазақстанда да қолға алынған жобалар көп. Бұған бақылауды әсте әлсіретуге болмайды.
Семинар-тренингте сонымен қатар «Нұр Отан» ХДП БҚО филиалы төрағасының бірінші орынбасары Кенжебай Нығметтің «ҚР Президентінің халыққа Жолдауын жүзеге асыру - партия қызметінің басым бағыты» тақырыбындағы, облыстық кәсіпкерлік және өнеркәсіп басқармасының бастығы Дияс Жәнібековтың «Батыс Қазақстан облысында «Бизнестің жол картасы - 2020» бағдарламасын жүзеге асырудың қорытындылары» тақырыбындағы және басқа да бірқатар баяндамалар тыңдалды.
Семинар соңында қатысушыларға сертификаттар тапсырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).