ОРАЛ. 25 наурыз. ҚазАқпарат /Елжан Ералы/ - Оралда Наурыз мейрамына орай «Орнықты отбасы - ұлт болашағы» атты жас отбасылардың шығармашылық байқауы өтті.
Қазақстан тәуелсіздігінің 20 жылдығы аясында «Нұр Отан» ХДП қалалық филиалы ұйымдастырған байқау қазақтың салт-дәстүрлерін дамыту, қоғамдағы отбасы беделі мен мәртебесін көтеру, жастарды шығармашылық іс-шараларға тарту мақсатында қолға алынды. Байқау шарттарына сәйкес жас отбасылар өз өнерлерін көрсетіп, бірі балаға ат қойып, екіншісі тұсау кесіп, шашу шашты. Наурыз көже, қазы мен ет тағамдарынан дәм таттырды.
Сайыс қорытындысында «Set-up» би студиясының жетекшісі Сұлтан мен Динара Дәуітовтер «Ең өнерлі жас отбасы» атанды. Сондай-ақ «Қазақстан-Орал» телеарнасының тілшісі Артур мен Гүлбану Мағзомовтар, Ж.Досмұхамедов атындағы педколледж студенті Диас пен Әйгерім Кенжеғалиевтер алғысхатпен, бағалы сыйлықпен марапатталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).