ОРАЛ. ҚазАқпарат - Орал қалалық сотының үкімімен ҚР ҚК 366-бабы 1-бөліміне (пара алу) сәйкес айыпты деп танылған Орал қалалық ішкі істер басқармасы пробация қызметі бөлімінің бастығы И.Нағметовке мүлкін тәркілеумен бірге параның елу еселенген көлемінде 1,250 млн. теңге айыппұл салынды.
БҚО сотының баспасөз қызметінен түскен мәліметке қарағанда, ол сонымен қатар өзін-өзі басқару және мемлекеттік органдарда лауазымды қызмет атқару құқығынан және полиция майоры арнайы шенінен айырылды.
Сот талқысында белгілі болғанындай, И.Нағметов 2015 жылғы қыркүйекте сотталған К.Хабиевтен мерзімінен бұрын шартты жазаға ауыстыру мәселесін шешу үшін инспектор болып жұмыс жасаған делдал арқылы 25 мың теңге пара алған.
Сот үкімді шығарған кезде қылмыстың сипаты мен ауырлығын, сонымен қатар сотталушының өз кінәсін мойындап, өкінгенін, асырауында кәмелетке толмаған балалары бар екендігін ескерді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).