ОРАЛ. 12 маусым. ҚазАқпарат - БҚО прокуратурасының қызметкері Руслан Аминов 5 маусым күні басы мен мойнынан жарақат алып, облыстық аурухананың жансақтау бөліміне жатқызылды.
БҚО ішкі істер департаменті тергеу басқармасының бастығы Мағауия Құрмашевтің айтуынша, 10 маусым күні прокуратура қызметкеріне қатысты бұзақылық жасағаны үшін күдікті ұсталды. Осыған байланысты ҚР ҚК 257-бабына сәйкес (бұзақылық) қылмыстық іс қозғалды. Күдікті аталмыш қылмысқа қатысты екенінен бас тартып отырған жоқ. Қылмыстық іс тергелу үстінде, оның басқа бапқа ауыстырылуы да әбден мүмкін. Ал күдікті Орал қалалық ішкі істер басқармасының уақытша оқшаулау изоляторына қамалды.
Аталған қылмыс прокурордың кәсіби қызметіне байланысты ма, ол тергеу барысында анықталады. Жәбірленуші соттарға ауыр қылмыстар бойынша мемлекеттік айыптаушы ретінде қатысқан.
Қазіргі кезде прокуратура қызметкері нейрохирургиялық бөлімге көшірілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).