ОРАЛ. 11 тамыз. ҚазАқпарат - «Ақжайық» футбол клубының стадионында спорт күніне орай және қазақстандық олимпиадашыларды қолдау бағытында шағын футболдан бұқаралық ақпарат құралдары арасында жарыс өткізілді.
Аталмыш футбол клубы мен облыстық туризм, дене шынықтыру және спорт басқармасы ұйымдастырған турнир қорытындысында үш команда бірдей ұпай жинады. Доп айырмасына сәйкес «Жайық спорт» газетінің жастары бірінші орынға шықса, «ТДК 42» каналы жігіттері - екінші, «Жайық Пресс» ЖШС үшінші жүлдені бөлісті. Оларға кубоктар мен ескерткіш медальдар табыс етілді. «Қазақстан - Орал» телеарнасы соңғы, төртінші орында қалып қойды. Сондай-ақ жарыстың үздік ойыншылары да марапатталды.
«Ақжайық» футбол клубының басшысы Рашид Хуснутдиновтің атап өткеніндей, спорт жарыстарын газет бетінде жазып, теледидардан көрсетіп, көпшілікке насихаттап жүретін журналистер бұл жолы жасыл алаңда өздері тым-тәуір өнер көрсетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).