ОРАЛ. 12 желтоқсан. ҚазАқпарат - Қазақстанның денсаулық саласында қызмет ететін қоғамдық бірлестіктері бірігіп, Ұлттық денсаулық сақтау палатасын құрған болатын. 12 желтоқсан күні облыстық мәслихаттың кіші залында жаңа құрылымның таныстырылымы болды.
Оған Ұлттық денсаулық сақтау палатасының төрағасы, медицина ғылымдарының докторы, профессор Мақсот Құлжанов арнайы келді.
- Еліміз бойынша 800-ге жуық қоғамдық бірлестік бар болса, соның әрбір үшіншісі денсаулық сақтау саласының ұйымдарына жатады. Әйткенмен, көпшілік бірлестіктердің жұмыс белсенділіктері ойдағыдай емес. Сондықтан, басты мақсатымыз - барлық медициналық бірлестіктерді бір жұдырықтай жұмылдырып, Президентіміздің саламатты Қазақстан идеясын қарқынды түрде жүзеге асыру, - деді палата төрағасы.
Аталмыш палата денсаулық сақтау саласындағы медицина қызметкерлері мен қоғамдық ұйымдар қызметінің тиімділігін арттырып, тұрғындарды сапалы медициналық қызметпен қамтамасыз етпек.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).