ОРАЛ. 15 желтоқсан. ҚазАқпарат - Орал қаласында жас отбасыларға арналған 108 пәтерлік тұрғын үй салынуда.
«Ақжайық-Жас отау» ЖШС директоры Айнұр Медеуованың айтуынша, бұл - «Жас отау» бағдарламасы бойынша салынып жатырған үшінші үй. Әзірге республикада мұндай бағдарлама Оралда ғана жүзеге асырылуда. Аталмыш тоғыз қабатты үйде 36 бір, 36 екі, 36 үш бөлмелік пәтер болмақ. Оның сметалық құны - 590 млн. теңге. Пәтерлердің бір бөлігі құрылыс шығынын жабу үшін сатылады. Жас отбасыларға 75 пәтер берілмек. «Тұрғын үй - жастарға» жобасы экономикалық жағынан тиімді. Жас отбасылар үш жыл бойы жалгерлік ақысын төлеп, «Тұрғынүйқұрылысжинақбанкіде» қаржы жинақтап, пәтер құнының 50 пайызын төлейді. Қалған қаржысын 5 пайыздық мөлшерлемемен алты жылға банктен несие алу жолымен жабады.
Батыс Қазақстанда күні бүгін аталмыш бағдарлама аясында 150-ден астам жас отбасы баспанамен қамтамасыз етілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).