ОРАЛ. Қыркүйектің 1-і. ҚазАқпарат /Ғайсағали Ералы/ - БҚО ішкі істер департаменті ұйымдасқан қылмыспен күрес басқармасының қызметкерлері Орал қаласындағы Мұхит көшесі бойында орналасқан «Фаст-Фуд» қоғамдық тамақтандыру орнынан жасырын ойынхананы анықтады.
Департаменттің баспасөз қызметінен ҚазАқпарат тілшісіне хабарлағанындай, «Арлан» арнайы бөлімшесі жауынгерлерімен бірлесе жүргізілген операция барысында 15 ойын автоматы, бір америкалық рулетка табылды. Он екі адамның ойнап отырғаны да белгілі болды. Бұлар - негізінен осында тұрақты келетіндер. Он тоғыз жасар оператор-қызды тексеру кезінде жасырылған 405,9 мың теңге табылса, 31 жасар ойыншы ер адамның қалтасынан екі грамм марихуана шықты.
Жасырын ойынхананың иесі - Орал қаласында тұратын 29 жасар жеке кәсіпкер. Айыптылар енді заң алдында жауап беретін болады.
Бұл - жыл басынан бері өңірде орын алған осындай екінші оқиға.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).