ОРАЛ. 7 маусым. ҚазАқпарат - Кеше оралдықтар орыстың ұлы ақыны Александр Пушкиннің туған күнін атап өтті.
Орал - А.С.Пушкин аялдаған Қазақстандағы жалғыз қала. Сол себепті қала тұрғындары ұлы ақын есімін ерекше құрмет тұтады. Қалада ақынның бірнеше ескерткіш-мүсіні бұрыннан орнатылса, 2006 жылы Қазақстан мен Ресей Президенттері Н.Ә.Назарбаев пен В.В.Путиннің қатысуымен А.Пушкин музейі ашылды.
Бұл жолы да жылдағы дағдымен әдебиет сүйер қауым ақын ескерткішіне келіп, тағзым етті. Ресей Федерациясының Оралдағы вице-консулы Дмитрий Пантелин, өнертану ғылымының кандидаты, доцент Галина Гурьева, А.Пушкинге қатты ұқсайтын Владимир Букреев және басқалар ақын шығармашылығының мәңгі өшпейтінін атап өтті. Шара барысында оның өз өлеңдерімен қатар Сергей Есенин, Жұбан Молдағалиев, Мұқағали Мақатаев сынды ақындардың жырлары да оқылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).