ОРАЛ. 3 қаңтар. ҚазАқпарат - Өткен жыл Махамбет Өтемісов атындағы БҚМУ профессоры, педагогика ғылымдарының докторы, Қазақстан Педагогикалық ғылымдары академиясының академигі Абат Қыдыршаев үшін жемісті болды.
Өмірдің елу деген бір белесіне шыққан батысқазақстандық ғалым Еуропалық ғылыми-өндірістік палатасының (Мәскеу қаласы) Еуропалық алтын медалімен, сондай-ақ сапа жөніндегі дипломымен (Diplom di Merito) марапатталды. Бұл жоғары награда ғалымның ғылым жолындағы табыстары мен жоғары сапалы кәсіби педагогикалық қызметі үшін берілді. Абат Сатыбайұлы БҚМУ-да (бұрынғы Орал педагогикалық институтында) аздаған үзілістермен 1990 жылдан бері еңбек етіп келеді.
Сонымен қатар жуырда Алматы қаласындағы Ұлттық ғылыми кітапхана жанындағы «Ғылым ордасы» баспасынан «Қазақстан ғалымдарының биобиблиографиясы» сериясының жалғасы ретінде А.Қыдыршаевқа арналған көрсеткіш те жарық көрді. Биобиблиографияға ғалымның өмірі, қоғамдық және педагогикалық қызметін сипаттайтын мәліметтер, оның еңбектері және ол туралы әдебиеттер енгізілген.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).