ОРАЛ. Қыркүйектің 9-ы. ҚазАқпарат /Елжан Ералы/ - БҚО-ның Бөкей ордасы ауданында екі бірдей мәдениет үйі күрделі жөндеуден кейін қайта іске қосылды,
деп хабарлайды ҚазАқпарат тілшісі.
Мұратсай ауылындағы мәдениет үйін ретке келтіруге 13,365 млн. теңге қаралса, соның 6,720 миллионы «Жол картасы» арқылы республикалық бюджеттен бөлінген. Жөндеу ісін «Санди» ЖШС (жетекшісі, жеке кәсіпкер Бибігүл Жұмағұлова) атқарып, жергілікті жерден 16 адам жұмысқа тартылды. Іші-сырты түгел жаңарған 150 орындық мәдениет үйінің жылыту жүйесі енді табиғи газға қосылмақ.
Темір Масин ауылдық округі орталығындағы мәдениет үйі 1985 жылы салынған болатын. Содан бері жөндеу көрмеген ғимаратқа өткен жылы жергілікті бюджеттен 7 млн., биыл «Жол картасына» сәйкес 6,362 млн. теңге қаралды. Жөндеу жұмысын жеке кәсіпкер Тарас Сәрсеновтің жігіттері (олардың жетеуі жергілікті) атқарып шықты.
Қайта түлеген мәдениет ошақтарына ауыл тұрғындары ерекше риза.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).