ОРАЛ. 17 қазан. ҚазАқпарат - Орал қалалық сотының 15 қазандағы қаулысымен терроризмге қатысы бар деген айыппен Батыс Қазақстан облысының үш тұрғынын қамауға алуға санкция берілді.
Облыстық соттың баспасөз қызметінен түскен мәліметке қарағанда, ұсталған үш күдіктіге қатысты ҚР ҚК-нің 233-3-бабы 2-бөлігімен, яғни «террористiк немесе экстремистiк қызметтi қаржыландыру және терроризмге не экстремизмге өзге де жәрдемдесу» көзделген қылмыс жасады деген айып тағылып, іс қозғалған болатын.
Тергеу органдары қамауға алу түріндегі бұлтартпау шарасын қолдануға санкция беру жөніндегі өтінішпен сотқа жүгінді.
Тергеу органының мәліметі бойынша қамауға алынғандар қоғамның қауіпсіздігіне және тәртібіне қарсы ауыр қылмыс жасаған. Бұл қылмыс түріне 8 жылға дейін бас бостандықтарынан айыру жазасы қарастырылғандығымен, бостандықта жүрсе олар қылмыстық қудалау органдарынан немесе соттан жасырынуға тырысатынын немесе қылмыстық әрекетпен шұғылданулары мүмкін деген уәжбен түсіндіреді.
Сот үшеуіне қатысты екі айға дейін бұлтартпау шарасына санкция беру туралы өтінішті қанағаттандырды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).