Шығысқазақстандық жасотандықтар қар суынан туындайтын қауіптің алдын алу үшін еріктілер тобын құруда
12:23, 15 Наурыз 2013
АСТАНА. 15 наурыз. ҚазАқпарат - «Жас Отан» жастар қанатының Шығыс Қазақстан облыстық филиалы Ұлы Отан соғысы ардагерлері мен зейнет жасындағы қарттарға көмек көрсету үшін еріктілерден құралған ұтқыр топ құруда.
Мұндай топтар қар суынан туындайтын төтенше жағдайдың алдын алу, су басу қаупі бар аймақтарға шығып, қар тазалауға қол ұшын беру жұмыстарын жүргізеді, деп хабарлады «Нұр Отан» ХДП Шығыс Қазақстан облыстық филиалынан.
«Жасотандықтар жыл сайын туындайтын табиғат апаттарының бірі еріген қар суынан туындайтын зардаптарды жоюда бірінші кезекте ерікті азаматтардың белсенділігі мен қол көмегін беру секілді адами құндылықтар еліміздегі әрбір жастың парызы деп санайды», - делінген хабарламада.