АСТАНА. ҚазАқпарат - Бүгін қазақстандық Зарина Дияс теннистен Илклей (Ilkley, Ұлыбритания) ITF турнирінде беташар кездесуін өткізді, деп хабарлайды «ҚазАқпарат» тілшісі.
myscore.ru сайтынан тікелей көрсетілімде белгілі болғанындай, Зарина әлемдік рейтингте 47-інші орында тұрған, осы турнирдің бірінші ракеткасы болып тіркелген франциялық Осеан Доденмен күш сынасты. Бірінші партияны франциялық теннисші 6:2 есебімен өз пайдасына жазды. Екінші партияда З.Дияс 6:4 есебімен басым түсті. Үшінші, шешуші партия барысында Зарина ұтылып жатып, жеңіске деген жігері мен шеберлігін көрсете білді. Сөйтіп тай-брейкте 7:3 есебімен қарсыласын тізе бүктірді.
Қазақстандық теннисші екінші айналымда әлемнің 103-інші ракеткасы, бельгиялық Алисон ван Эйтванкпен күш сынасады. Зарина онымен бұрын да кездескен, сондықтан біршама сыралғы қарсылас деуге болады.
Еске сала кетейік, өткен аптада Зарина Дияс Манчестер турнирінің жеңімпазы атанып, соның нәтижесінде дүниежүзілік рейтингте 133-інші сатыға көтерілген болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).