АСТАНА. ҚазАқпарат - Қазақстандық, әлемнің 233-ракеткасы Тимофей Скатов Лиссабон турнирінің жартылай финалына шықты, деп хабарлайды ҚазАқпарат тілшісі.
Қазақстандық теннисші ширек финалда әлемнің 165-ракеткасы, франциялық Бенуа Пэрмен кездесті.
Б.Пэр кезінде ATP жарыстарында төрт рет чемпион атанып, рейтингте 65-орынға дейін көтерілген болатын.
Соған қарамастан, Т.Скатов атақты қарсыласын 6:4, 2:6, 7:5 есебімен тізе бүктірді.
Екі сағат жарымнан астам уақытқа созылған матчта Т.Скатов 1 эйс жасап, 7 брейк-пойнттың үшеуін пайдалана білді. Қарсыласы 15 эйс, 3 брейкпен (15 брейк-пойнт) көзге түсті.
Тимофей Скатов финалға шығу үшін әлемнің 137-ракеткасы, италиялық Марко Чеккинатомен таласады. Ол әлемнің 129-ракеткасы, испаниялық Карлос Табернерді жолдан тайдырды - 7:6 (7:2), 6:4.
Еске сала кетейік, бұдан бұрын қазақстандық теннисшінің Аргентинадағы жарыстың ширек финалына шыққанын жазған болатынбыз.
Сондай-ақ Бейбіт Жукаев екі мәрте ел чемпионы атанды.
Фото: sports.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).