Тимофей Скатов Швециядағы турнирде қарсыласын ойсырата ұтты

АСТАНА. KAZINFORM – Қазақстандық, әлемнің 230-ракеткасы Тимофей Скатов Бастад (Швеция) ATP 250 турнирінің іріктеу сайысын жеңіспен бастады.

Қазақстандық теннисші іріктеу сайыстарында 1-ракетка болып тіркелген, дүниежүзілік рейтингіде 135-орында тұрған италиялық Маттео Гигантені ойсырата ұтты – 6:1, 6:0.

Бір сағатқа жетпейтін уақыт ішінде Скатов 3 эйспен бірге 13 брейк-пойнттың алтауын мүлт жібермеді. Гиганте 2 эйс, 1 брейктен (2 брейк-пойнт) аса алмады.

Тимофей Скатов іріктеу сайыстарының финалында әлемнің 158-ракеткасы, тағы бір италиялық Андреа Пеллегриномен ойнайды. Оны жеңсе, негізгі жарысқа жолдама алады.

Бастад додасының іріктеу сайысында Денис Евсеев пен Дмитрий Попко да бақ сынауда.

Еске сала кетейік, бұдан бұрын Рыбакинаны жеңген теннисшінің Уимблдонда чемпион атанғанын жазған болатынбыз.

Астанада теннистен Президент кубогі үшін жарыс басталады. 

Елордадағы челленджер турнирінің іріктеу сынында Қазақстаннан қатысқан Ерасыл Ерділдә, Виталий Зацепин, Ислам Орынбасар және Ілияс Маратұлының бәрі де жеңіліс тапты.