ОРАЛ. 3 ақпан. ҚазАқпарат /Елжан Ералы/ - Батыс Қазақстан облысында мемлекеттік тіркеуден өткен 350-ден астам үкіметтік емес ұйым болса, соның жүзден астамы 13 әлеуметтік бағыт бойынша белсенді қызмет атқарып келеді.
Соңғы екі жылда жаңадан 25 ұйым құрылды. Бұл туралы облыстық ішкі саясат басқармасында өткен кеңесте айтылды.
Басқарма бастығы Тілекқабыл Имашевтің айтуынша, өңірдегі үкіметтік емес сала билік пен халық арасын жақындастыратын, көпшіліктің талап-тілегін жеткізе алатын іргелі ұйымға айналды. Биылғыдай Тәуелсіздіктің 20 жылдығы аталып өтілетін жылда атқарылуға тиісті істер аз емес.
Облыс аумағында жүргізілген сауалнама қорытындысына қарағанда, сарапшылардың 63,6 және тұрғындардың 48,2 пайызы ҮЕҰ қызметінің қажеттігін білдіріп отыр. Оған мемлекет тарапынан да қолдау көрсетіліп келеді. Бұдан төрт жыл бұрын ҮЕҰ-ны дамытуға бөлінген қаржы тек 4 млн. теңге болса, 2008-2010 жылдарға арналған аймақтық бағдарлама аясында 60 млн. астам теңге игерілді. Биыл қаржы көлемі ұлғайып, 22,5 млн. теңгеге жетті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).