Елбасы өз сөзінде ағымдағы жылдың ақпанында Ұлттық қордан 1 триллион теңге бөлу туралы шешім қабылданғанын еске салып өтті. 500 млрд. теңге көлемінде 2 траншпен бөлінген қаржы 2014-2015 жылдарда экономика өсімін қолдауға бағытталған еді. «Біздің жобаларды аяқтау, өткір тұрған мәселелерді шешу үшін Үкіметке Ұлттық қордан 1 трлн. теңгенің 500 млрд. теңге көлеміндегі екінші траншын келесі мақсаттарға - келесі жылға бөліп, бағыттауды тапсырамын. Ең бірінші - шағын және орта бизнесті, сонымен қатар ірі кәсіпкерлікті жеңілдікті несиемен қамтамасыз ету үшін қосымша 100 млрд. теңге бөлу қажет», - деді Н.Назарбаев. Мемлекет басшысының атап өтуінше, аталған қаржы тамақ, химия, машина жасау, сонымен қатар қызмет көрсету салаларындағы жобаларды жүзеге асыруды қамтамасыз ететін болады.