ОРАЛ. ҚазАқпарат - Жуырда ҚР Ұлттық ұланы «Батыс» өңірлік қолбасшылығының әскери қызметкері, сержант Наурызбай Әлімханов Атырау қаласында көпірден секірмек болған қызды құтқарып қалды.
«Батыс» өңірлік қолбасшылығының баспасөз қызметінен хабарлағанындай, сол күні 5546-әскери бөлімге қарасты жедел мақсаттағы батальон автомобиль взводының жүргізушісі, сержант Н.Әлімханов жеке құрамды тасымалдау үшін қалалық ішкі істер басқармасына келе жатады. Сол кезде көпірден секірмекші болып тұрған қызды байқап қалады. Дереу автокөлігін тоқтатып, артынан байқатпай келіп, қызды қолынан ұстап, кері тартып алады. Сосын полиция қызметін шақырып, өзі қыздың қасында болады. Өзін құтқарғаны үшін «түрлі мәселеден құтылғысы келіп, шынымен өмірмен қош айтысқысы келген» қыз кейін Ұлттық ұлан жауынгеріне алғысын айтады.
Қырағылық әрі батылдық көрсеткені үшін Н.Әлімханов 5546-әскери бөлім командирі тарапынан ынталандырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).