ОРАЛ. 19 наурыз. ҚазАқпарат /Елжан Ералы/ - Ұлыстың ұлы күні қарсаңында ІІІ топтағы мүгедек кәсіпкер Қуандық Орынбаев компьтерлік техникаға ие болды.
Мүмкіндігінің шектеулігіне қарамай Қуандық Төлеуішұлы облыс орталығынан интернет клуб ашқан болатын. Ісін жүргізу үшін қажет құрал-жабдық алуға жағдайының жоқ болуы себепті ол «Даму» кәсіпкерлікті дамыту қоры» АҚ-ның БҚО бойынша аймақтық филиалына жәрдем сұрап өтініш жазған. Ал аталмыш ұйым кәсіпкерлікпен айналысатын мүмкіндігі шектеулі жандарды қолдауға арналған «Даму-Көмек» бағдарламасы аясында демеуші тапқан. Алматы қаласындағы «Олжа» АҚ-ның басшылығы оралдық жас кәсіпкердің мұңын естіп, көмек қолын созған. Сөйтіп Қуандық Орынбаев екі жиынтық компьютерге, екі веб-камераға, сканерге, сандық фотоаппаратқа ие болды.
«Даму» кәсіпкерлікті дамыту қоры» АҚ-ның БҚО бойынша аймақтық филиалының бас менеджері Айгүл Имашеваның айтуынша, жыл басында дәл осындай көмек мүмкіндігі шектеулі кәсіпкер әйелдерге де көрсетіліпті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).