ОРАЛ. 17 желтоқсан. ҚазАқпарат - Хромтауда волейболдан ерлердің ұлттық лига командалары арасында ҚР ХХІІ чемпионаты бірінші турының ойындары мәреге жетті.
«Жайық» волейбол клубының директоры Шоқан Кеңесовтің хабарлағанындай, Оралдың «Конденсат-Жайықмұнай» командасы соңғы екі ойынында да жеңіске жетті. Өскеменнің «ШығысҚорғасынҚұрылысын» 3:2 есебімен тізе бүктірсе, «Таразды» 3:1 есебімен ұтты. Сөйтіп биылғы біріншілікте қарсыластарының бәрін тізе бүктіріп, әзірге жеңіліссіз келе жатқан батысқазақстандықтар 18 ұпаймен көш бастады. Өскемендіктер екінші, хромтаулықтар үшінші орында келеді.
Енді «Конденсат-Жайықмұнай» 7-11 қаңтар күндері Петропавлда «Есіл», «Атырау», «ТНК Казхром» командаларымен күш сынасады. Оралдағы беташар ойындарда Игорь Никольченконың шәкірттері бұл үш клубты да жеңген болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).