ОРАЛ. 17 желтоқсан. ҚазАқпарат - Павлодар қаласында волейболдан ерлердің ұлттық лига командалары арасында Қазақстан чемпионаты екінші турының ойындары мәреге жетіп, онда Оралдың «Конденсаты» мен ел чемпионы «Алматы» жеңімпаз атанды.
Аталмыш турда Игорь Никольченко жаттықтыратын оралдықтар «Алматы», «Павлодар», «ШығысҚорғасынҚұрылыс» (Өскемен), «Есіл» (Петропавл) командаларын ұтып, аса тартысты өткен матчтарда «Атырау» мен хромтаулықтарға 2:3 есебімен жол берді. Сөйтіп «Алматы» командасымен бірдей, 12 ұпайға қол жеткізді. Бірінші турда небәрі 8 ұпай жинаған «Конденсат» үшін бұл - жақсы жетістік. Жалпы, екінші турда жеңілмеген команда жоқ, бұл жүлделі орындар үшін бәсекенің тартысты болатындығын көрсетеді.
Екі турдан кейін 20 ұпай жинаған «Конденсат» үшінші орынға көтерілді. Көш басына 26 ұпаймен «Алматы» орнықса, одан бір ұпайы кем «Атырау» екінші орында келеді.
Үшінші тур ойындары жаңа жылда, 7-16 ақпанда Өскемен қаласында өтеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).