АСТАНА. ҚазАқпарат – Қазақстанның екінші, әлемнің 51-ракеткасы Юлия Путинцева Рим WTA 1000 турнирінің екінші айналымына шықты, деп хабарлайды ҚазАқпарат тілшісі.
Қазақстандық спортшы алғашқы айналымда рейтингіде 76-орында тұрған болгариялық Виктория Томовамен шеберлік байқасты.
Матч аса тартысты өтіп, үш сетке созылды. Бірінші партияда тай-брейкте болгариялық спортшы басымдылық танытты – 7:6 (7:5). Екіншісінде Юлия есе қайырды – 7:6 (7:3). Үшінші, шешуші сетте Путинцева бет қаратқан жоқ – 6:0.
Үш сағатқа жуық уақытқа созылған бәсеке барысында Ю.Путинцева 2 эйс жасап, 18 брейк-пойнттың 8-ін пайдаланды. Қарсыласы 5 брейктен (14 брейк-пойнт) аса алмады.
Юлия Путинцева үшінші айналымға шығу үшін әлемнің 5-ракеткасы, америкалық Кори Гауфпен таласады.
Қазақстанның бірінші, әлемнің 6-ракеткасы Елена Рыбакина екінші айналымда рейтингте 65-сатыдағы италиялық Ясмин Паолинимен ойнайды.
Еске сала кетейік, бұдан бұрын теннистен әлем чемпионаты іріктеу турнирінде Қазақстан жасөспірімдері Аустралиямен кездесетінін жазған едік.
Сондай-ақ Александр Бублик Рим мастерс турнирін сәтті бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).