ОРАЛ. 28 желтоқсан. ҚазАқпарат - Жаңақала ауданында Жаңажол дәрігерлік амбулаториясы күрделі жөндеуден кейін қайта ашылды.
Амбулаторияны күрделі жөндеуден өткізуге биыл облыстық бюджеттен 20 млн. 460 мың теңге қаралып, жұмысты атқару «Армут» ЖШС-не тапсырылған болатын. Тынымсыз жұмыс істеген «Армуттың» құрылысшылары аз уақыт ішінде амбулатория төбесінің ағашын, шатырын алмастырды, ішіне кафель төсеп, бөлмелерге еурожөндеу жүргізді. Сөйтіп, қысқа мерзімде ескі жай сырты ауыл ажарын ашар, іші жанды жадыратар әсем ғимаратқа айналып шыға келді.
Нысанның ашылу салтанатында аудан әкімі Лавр Хайретдинов елімізде мұндай оң өзгеріс-жаңалықтардың аз емес екендігін айтса, облыстық денсаулық сақтау басқармасы бастығының орынбасары Мәншүк Аймұрзиева алдағы жылы Жаңақазан ауылында да осындай қуаныш болатынын жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).